Su MAN l’ant abertu a su pùbblicu in su 1999. A primu sa sea fiat intro de unu palatzu de sos annos Binti, chi tando fiat sea de s’Istitutzione de sa Provìntzia, chi fiat in mesu de sas artèrias de su tzentru istòricu de Nùgoro. Fintzas a su 2003 fiat inseridu comente ufìtziu in intro de su setore cultura de s’amministratzione provintziale. Su primu nùcleu de sa colletzione est nàschidu ponende a pare paritzas regortas pùbblicas (Provìntzia, Comune, Ente provintziale pro su turismu, Càmera de cummèrtziu). Movende dae s’idea de istituire una pinacoteca provintziale s’est isvilupadu unu progetu museale agiornadu cun unu traballu de chirca e cunservatzione ma finas cun una atividade manna de espositziones e de laboratòrios. Fatu-fatu sa colletzione est crèschida e s’atividade at interessadu finas su cuntestu de su territòriu. In su 2004 su museu at conchistadu s’autonomia de sa gestione, s’est istruturadu comente istitutzione sena personalidade giurìdica e est intradu in s’Amaci, su Sòtziu italianu de sos museos de arte cuntemporànea. In su 2013 su MAN at logradu su reconnoschimentu regionale comente museu de primore. Su programma de riòrdinu e isvilupu previdit de abèrrere unu tzentru espositivu nou in duos edifìtzios istòricos in pratza Bustianu Satta e lassare sa sea de como pro sa colletzione permanente.