Ite est sa Carta de sa calidade de sos servìtzios

Sa Carta de sa calidade de sos servìtzios est pro dare risposta a su bisòngiu de fissare règulas e printzìpios de su raportu intre sas amministratziones chi frunint sos servìtzios e sos tzitadinos chi nde usufruint. Est comente unu patu cun sos utentes, un’aina de comunicatzione e de informatzione chi lis permitit de ischire cales sunt sos servìtzios a disponimentu, sos livellos e sas modalidades promissos. Sa Carta permit puru de iscumproare chi sos impinnos chi s’ente si pigat siant rispetados e cunsentit a sos utentes de dare unu pàrrere subra de sos servìtzios e, si in casu, de presentare unu recramu impitende su mòdulu chi s’agatat in sa billeteria.

Su de àere adotadu sa Carta de sos Servìtzios dae parte de su MAN_Museu de arte de sa Provìntzia de Nùgoro, faghet parte de sas initziativas pro ampriare s’avaloramentu de su patrimòniu culturale costoidu e pro cuncordare sas esigèntzias de sos utentes cun sa tutela, cun sa chirca e su cun su manìgiu de sas atividades.

Cada tantu sa Carta benit agiornada pro istabilizare sos cambiamentos positivos  e sos livellos noos de calidade logrados pro more de progetos de mezoru chi podent essire a campu finas cumpidende cun regularidade sas opiniones de sos utentes. Sa Carta est publicada in su situ istitutzionale de sa Provìntzia de Nùgoro e de su MAN; sa Carta est a disponimentu in pabiru in sos ufìtzios amministrativos.

Printzìpios fundamentales

Su MAN, pro s’acumprimentu de sas atividades istitutzionales suas, si basat subra de sos “printzìpios fundamentales” de sa Diretiva de su Presidente de su Consìgiu de sos Ministros de su 27 de ghennàrgiu 1994:

Agualidade e impartzialidade
Sos servìtzios sunt frunidos cunforma a su printzìpiu de agualidade garantende su matessi tratamentu a totus sos tzitadinos chentza fàghere distintziones de natzionalidade, de sessu, limba, religione, pàrrere polìticu.

Continuidade
Su MAN garantit continuidade e regularidade in sos  servìtzios. Si b’at dificultades e atropellos si impignat a dare ischidu cun tempus a sos utentes e a leare totus sos provedimentos netzessàrios pro dare su prus pagu istrobbu possìbile.

Leare parte
S’Istitutu promovet s’informatzione subra de sas atividades chi ammàniat e, in sos sèberos chi faghet in sa gestione, tenet contu de sas esigèntzias e de sos consìgios propostos dae sos utentes, sìngulos o assotziados.

Atòliu e eficatzidade
Su Diretore e su personale de su MAN persighint s’obietivu de sighire a mezorare s’atòliu e s’eficatzidade in su servìtziu, impreende sas solutziones tecnològicas, de organizatzione e de protzeduras prus funtzionales pro s’iscopu.

Cortesia
Totu su personale de su MAN, in sos cunfrontos de su pùblicu, tenet presentes sos printzìpios de cortesia eroghende sos servìtzios a manera crara e atzessiva pro cada genia de utentes.

Presentada de su museu

Cunditzione giurìdica
Dae su 1999 - annu chi at abertu a su pùblicu - a su 2003 su MAN est istadu inseridu comente “ufìtziu” in su setore Cultura de s’Amministratzione Provintziale de Nùgoro, cun unu ordinamentu internu a tenore de su de s’ente de apartenèntzia. In su 2004 est diventadu Istitutzione de sa Provìntzia de Nùgoro cun autonomia gestionale e chentza personalidade giurìdica.

Sea e istòria
A primu s’idea fiat de fàghere una Pinacoteca Provintziale ma a pustis ses pensadu a unu museu modernu. Su primu nùcleu de sa colletzione, cun òperas postas dae Provìntzia, Comune e Camera de Cummèrtziu, est istada sa prima base pro fraigare unu progetu dinàmicu e atentu a su territòriu. Su MAN est collocadu in su tzentru istòricu de Nùgoro, in carrera de Bustianu Satta chi nch’essit a sa pratza chi tenet su matessi nùmene. Innantis de l’abèrrere a su pùblicu, custa sea l’ant ristruturada a tales de l’adatare a sos livellos internatzionales, sighende sos critèrios de pretzisione e de limpiesa de formas, cunforma a s’usu chi fiat destinada: s’espositzione de sa colletzione permanente, s’atividade espositiva de sas mustras temporàneas, sos servìtzios a su pùblicu. S’istrutura est a bator pianos (cun su pianu terra) e sos ispàtzios sunt distribuidos gasi: a pianu terra una sala pro espositziones pro sas mustras temporàneas, una sala pro sos servìtzios didàticos, un’àtriu in ue ant ricavadu un’ispàtziu pro su servìtziu de retzidura, billeteria, bèndida de catàlogos e vigilàntzia; su primu pianu cun una sala espositiva, bator salas pro sos ufìtzios, unu depòsitu; a su segundu pianu àteras salas pro espositzione; a su de tres pianos una sala manna dedicada a su sòlitu a sas mustras cuntemporàneas.

Dae carchi annu su MAN, movende dae sa sea sua istòrica, at comintzadu a crèschere e a si dare assentu nou pro si chèrrere presentare comente unu sistema ampru chi siat a tretu de intervènnere de interlocutore importante in s’organizatzione de sa zona istòrica de sa tzitade. S’obietivu est de diventare un’istrutura polifuntzionale frunida de laboratòrios de didàtica pro s’educatzione a s’immàgine, de una biblioteca e de unu archìviu pro sa catalogatzione de sos benes artìsticos, de depòsitos chi si potant consultare pro sos istudiosos, de un’ambiente internu pro fàghere duplicados fotogràficos de sas òperas, de una setzione de restàuru e de istùdiu.

Missione
Dae cando at abbertu, su MAN at aplicadu sa definitzione de s’ICOM (International Council of Museums) ,chi afirmat chi su museu est un’istitutzione permanente, chentza fines de lucru, a servìtziu de sa sotziedade e de s’isvilupu suo, aberta a su pùblicu, chi acumprit chircas subra sas testimonias materiales de s’òmine e de s’ambiente suo, las otenit, las costoit, las comùnicat e, mesches, las esponet pro iscopos de istùdiu, de educatzione e de recreu. Cun sa cussèntzia de custu còmpitu, pro mèdiu de propostas culturales diferentes, su MAN chircat de acrarire dibàtidos artìsticos, si interrogat subra de su tempus passadu e de sas tendèntzias cuntemporàneas noas, organizende unu programma de eventos pro cada mustra. S’atividade de espositzione, basada subra de mustras temporàneas temàticas, antològicas, personales dedicadas a sos artistas de generatziones e movimentos diferentes, non trascurat de torrare a interpretare sa colletzione permanente e no abbarrat inserrada in intro de su perìmetru de su museu, chi incoràgiat e sustenet sas atziones in su territòriu, pighende parte a s’organizatzione e a sa ordimìngiu de àteros progetos.

Oferta culturale

Colletzione
Sa colletzione de su MAN est nàschida ghetende a unu totu sas colletziones de propiedade de Entes Pùblicos de Nùgoro e est su resurtadu de una seletzione, a primore, de òperas  de artistas sardos dae sa fine de s’Otighentos a dies de oe. Pagu a mancu de 500 òperas de sos  prus autores importantes de s’istòria de s’arte sarda:Antonio Ballero, Giuseppe Biasi, Francesco Ciusa, Giovanni Ciusa Romagna, Mario Delitala, Carmelo Floris, Mauro Manca, Costantino Nivola, Maria Lai fino a Rosanna Rossi, Vincenzo Satta, Antonio Secci e àteros meda. In sa colletzione b’at finas una regorta de importàntzia de disinnos e tzeràmicas de Salvatore Fancello e s’òpera gràfica de Giovanni Pintori. Sas òperas de sa colletzione faghet a las bisitare, a mutas, in su segundu pianu de su museu, allestidas torra cada borta segundu critèrios diferentes, cun percursos a tema o dedicados a sos autores.

Mustras temporàneas
Atividade primària de su MAN sunt sas mustras temporàneas chi su museu contivìgiat cun còidu e impinnu proponende·si comente e logu de chirca e de comunicatzione de sos prus  fenòmenos innovativos de sa creatividade, cun una mentalidade culturale dinàmica, in ue s’identidade locale esistit e si afortit in su cunfrontu cun s’arte globale, fintzas pro more de sos iscàmbios cun àteras colletziones de àteros museos siat italianos siat internatzionales. Su museu proponet, in lìnia cun sa missione sua, mustras dedicadas a artistas e movimentos de s’istòria de s’arte moderna cun progetos chi pertocant sos limbàgios de s’arte cuntemporànea de oe in die. Cada annu su museu proponet una mèdia de bator eventos mannos de espositzione  prus àteros paritzos progetos.

Eventos Extra Muros
S’atividade “extramuros” si faghet fora de sas istruturas architetònicas e naturales de su museu pro si chèrrere acurtziare a sa sotziedade, astringhende·si cun s’atividade a sedes noas, finas temporàneas. Custa atzione agiuat su protzessu de integratzione in su tessìngiu de sa comunidade, dispedende·nche sa idea chi s’arte faghet a l’ammirare petzi in su museu e est pro cussu chi su MAN, a prus de s’atividade espositìva, oferit a su pùblicu paritzos apuntamentos e unu programma mannu de eventos destinados a utentes de edades diferentes, a tales de acuntentare diferentes rechestas culturales. Cunforma a sos obietivos suos, sa programmatzione de su museu chircat de s’abèrrere a su mundu cuntemporàneu chentza codiare sas tendèntzias prus clàssicas e istòricas. Sa colletzione permanente puru rispetat custu issèberu.

Atividade didàtica
Su Dipartimentu educativu de su MAN est un’aina chi serbit a sos insignantes, a sos pitzinnos e pitzocos, dae s’iscola de s’infàntzia a s’iscola segundària de segundu gradu. Su Dipartimentu proponet atividades educativas chi dant importàntzia meda a sas formas de s’arte cuntemporànea cun sos laboratòrios fatos pro isperimentare una didàtica chi siat operativa. De custa manera sos percursos sunt pensados pro interessare sos utentes e diventant ocasiones pro connòschere e meledare subra de sos limbàgios e sas formas de s’arte, introduint sos dischentes in s’esperièntzia de intepretare su traballu de un’artista, sugerint modellos e istrategias noas a sos dotzentes, favorint s’isvilupu de sa sensibilidade, rapresentant una possibilidade pro comintzare protzessos noos, formativos, educativos e multidisciplinares. In prus su dipartimentu didàticu previdit paritzos laboratòrios, annantos a sas mustras ma non pro fortza cullegados a issas, organizados in su MAN o in carchi àtera istrutura de sa tzitade o in sas biddas de su tzircundàriu, fatos dae personale de su museu paris cun artistas e espertos. Custas sunt atividades pensadas e cumpostas pro mannos e minores pro crèschere sa connoschèntzia de s’arte e pro dare suportu intelletuale e documentale a sas mustras de su museu. Sos percursos de sos laboratòrios podent mudare in sos argumentos, in sa manera de los tratare e de los aprofundire in base a sas esigèntzias chi podent tènnere sos utentes, segùgiant s’aprendimentu de sas realidades noas de s’arte de oe in die e de sas tècnicas de comunicatzione cuntemporànea; sighint unu mètodu didàticu multidisciplinare; afortint sa punna de achirire tècnicas creativas e istrumentos noos  pro realizare òperas de arte cuntemporànea; isvilupant su raportu intre pùblicu e museu. Sos laboratòrios contant s’arte pro mèdiu de figuras, sonos e paràulas, impitende fintzas su limbàgiu multimediale e cuntzetuale, a tales de permìtere, a chie nde gosat, de imparare sos elementos fundamentales de su modu de fàghere arte, faghende su paragone diretu cun sas òperas analizadas, chi sunt presentadas e istudiadas intro de su perìodu istòricu e de sos fatos sutzessos cando las ant cuntzepidas. Custu sistema didàticu tratat s’arte cun  cussèntzia pro sa funtzione chi tenet in sos mecanismos evolutivos cumplicados de sa vida de s’òmine.

Pro informatziones e prenotatziones si podet mutire cada mangianu a su nùmeru de tel. 0784.1821244 o si podet imbiare una posta eletrònica a didattica.museoman@gmail.com.

Dae annos su museu est collaborende, pro more de acordos intre entes, cun s’ASL e cun sa domo de reclusione de Nùgoro, presentende laboratòrios e arrejonadas istudiadas. In prus, dae tres annos su museu proponet laboratòrios de informàtica de cada livellu in ue sas letziones sunt fatas cunforma a sas connoschèntzias, a sas capatzidades e a sos interessos de sos dischentes. In cada laboratòriu b’at dòighi abojos de ora e mesu cadaunu, cun prus che àteru atividades pràtigas pro leare cunfiàntzia cun su computer e cun sas aplicatziones prus importantes. Cada laboratòriu durat 18 oras in totu. Su museu frunit su materiale netzessàriu a totus sos iscritos.

Servìtzios, tutela e partetzipatzione

Atzessibilidade esterna

A su MAN si bi arribat cun sos mezos pùblicos chi firmant a curtzu in pratza de Vittorio Emanuele; cun sos mezos privados segundu sos oràrios de sa ZTL cun paritzos parchègios pùblicos a pagamentu in sos deretos de su museu; b’at parchegios riservados pro sas veturas de chie at dificultades de movimentu.

Atzessibilidade interna e seguresa
Sos ispàtzios pro su pùblicu sunt adeguados pro intrare sos bisitadores disàbiles ca sas barrieras architetònicas nche sunt istadas bogadas: a disponimentu b’at un’ascensore pro totus sos pianos e sos servìtzios igiènicos a su pianu terra. B’at sistemas de seguresa in totu su museu cun telecàmeras pro bàrdia e sistema de allarme.

Abertura
Su MAN est abertu a su pùblicu cada die, dae su martis a sa domìniga segundu sos oràrios in fatu: Ierru 10:00/13:00 – 15:00/19:00. Istiu 10:00/13:00 – 15:00/20:00. Presentende rechesta e pro esigèntzias particulares, faghet fintzas a abèrrere in lunis. Sunt prevididas abertura istraordinàrias pro festas istatales o pro eventos particulares. In casos goi su MAN provedit a dare ischidu innantis pro mèdiu de sos mezos de comunicatzione chi at a disponimentu.

Billetteria
Intreu: 3,00 èuros - Iscontadu: 2,00 èuros (dae sos 18 a sos 25 annos) - Gratis: suta sos 18 e prus de 65 annos - Billete ùnicu MAN/TRIBU: 4,00 èuros, durat 5 dies - Gratis: ùrtimas domìnigas de su mese e pro carchi festa siat istatale o nono, cun avisu de su museu a sa colletividade. No est prevididu de comporare su billete in internet

Retzidura
S’isportellu pro su pùblicu in su MAN esponet e distribuit a indonu sos comunicados de imprenta, su materiale informativu, còpia de sa carta de sos servìtzios, su mòdulu pro s’iscrìere a sa rubrica eletrònica. Presentende rechesta sunt a disponimentu sos mòdulos de recramu.

Fruitzione
Francu esigèntzias particulares, su MAN aberit totus sas salas a su pùblicu. Cando una sala abbarrat serrada su personale de s’isportellu pro su pùblicu avisat sos bisitadores. Pro iscolas e grupos est obligatòriu a prenotare. Cando b’at allestimentos temporàneos su museu cumpletat su percursu de espositzione cun pannellos ispiegadores postos a bortas in foras a a bortas in intro de sas salas, cunforma a sas esigèntzias de sa mustra. Sa riprodutzione fotogràfica o cun filmados est cunsentida petzi pro usu personale e cun trastes chi non siant professionales. A onzi modu sa riprodutzione cheret semper autorizada. Pro iscopu diversu dae s’usu personale si podet presentare domanda de autorizatzione a sa Diretzione pro sa riprodutzione fotogràfica o de filmados de sos benes espostos (tel. 0784.1821216 - nuoro.museoman@gmail.com). Su MAN impreat istrumentos vàrios pro dare ischidu de sas initziativas chi faghet: volantinos, comunicados de imprenta, publitzidade e aprofundimentos in sa televisione, publitzidades in rivistas ispetzializadas o in sos giornales de su logu. Postatziones fissas in tzitade, manifestos (normale o 6x3) in tzitade o in su territòriu, ufìtziu imprenta, situ internet, regorta de artìculos de giornale in pabiru o eletrònicos, relata annuale subra de sas atividades, profilos in facebook e twitter. In s’isportellu de su pùblicu b’est sa libreria in ue si podent comporare sas publicatziones e sos trastes produidos dae su museu.

Raportu cun su pùblicu
In sa billeteria, a disponimentu de su pùblicu, b’est su mòdulu pro si marcare a su servìtziu pro retzire su notitziàriu e pro si pònnere in s’indiritzàriu in pabiru. B’est finas su mòdulu de recramu semper a disponimentu de totus sos bisitadores.

Carta de sa calidade de sos servìtzios
Custa carta est a disponimentu in s’isportellu de su pùblicu. L’agiornant cada borta chi est netzessàriu si b’at carchi modifica in sos servìtzios.

Iscarriga su PDF.